SOROTI – Karaida itumoro igereesan lu Kumi ka Ngora, aretonokin ka aitolot engunget kanu ebe asekunio na ebishop kec, Charles Okunya Oode, Ikristayon lu emaete edeke okanisan luko Baptist kesi adautu asipokin engarenon kec lo itetet komamei ecelet.
Eraasi 22.01.2022, ikusia lu elimonokinete eijiri okanisa lo imunyokolen lo obaptist kesi apotu itojokaasi ainyakakin Sam Eibu Okiror lo lem ijaanakini kwape ebishop kec lo aanyanaret nako Teso ka Karamoja kitoni angetakin bobo ikaru ikany.
Itolositai aseo na kotupitete ikisila lu aseo lu ekanisa lo obaptist, lu itemitemitos ebe ibusakinit ikuristayon aitlot aseo na engarenok lu ekanisa akaulo na angin ikaru ikany.
Lo epolokinit ekodet lo asekunio, aseo ka aisibikinio na ebishop ko Uganda, Andrew Benjamin Ariko, ngesi abu itijena ebe apotu kesi oweasi iyemuto ne ejaasi ikanisan kere lu okwap aijaikin kesi arerengu na aitodiar eipud kec aibwo kotoma adokena nu engarenone nu egelegela.
Konye, edaun aseo na aicokisio nu okwap, opotu kesi itegeasi ainapeta nu aseo na engarenok lu apolok lu awanyanaret aicokisio.
“Ne nesi do etojokarere ebe mam ber ebusakinit aitolitol engarenone ke bishop Eibu,” abala Ariko.
Kiyatakite ebe amamei idio itunganan yen abu itepeg asekunio ke aitodol apak na asekere kesi kwape engarenok.
Kwana, idarit do Eibu apaaran acie na isiboikinere ngesi bobo oicolong lo ebishop kwape ecokon lo ewanyanari ikanisan kere lu ari nako Teso ka Karamoja.
Icie kangun lu apotu eswamak lu eweete akirot na edeke osekutu aingarenikin kesi imoriaritos; Johnson Ebulu lo elomunit ko Orungo, Amuria kwape atupiton ebishop.
Arai ber Simon Peter Okalebo, loko Pallisa, ngesi elaaganete ka ngesi konye abu kiteleka akaulo na adumun aseeta 12 kanu akanyape.
Simon Okuni lo Pallisa ngesi aponi osekunai kwape Egirigiran akaulo na ngesi da aikongun aseeta 12 ailany lo arukosi ka ngesi lo abu iraru 6.
Kosodi konye Girifasio Orone ka Moses Otim asekunio aingarakite aitemonokin eiswamae ke ebishop.
Aponi osekunai Simon Peter Elungat kwape engarenon lo epolokini aisisianakin idwe Naesabiiti kosodi Betty Koote amumukaar eicolong lo aingarenikite atumunak.
Eibu ngesi abu isialamik erionget kec lo aseo kanu aitolot ainapeta ejok, kosodi da aisukunyikin aiyalama ke ne ejaasi Ikristayon kanu aitodikin ngesi amuno na epolo noi.
“Eyataki na eong amuno ebe imunosi yesi eong, elipit do eong Lokasuban isirereng yesi, ka aijaikin eong agogongu ka acoa na aijaanakin ejok,” abala Eibu.
Abu do kilip Ikristayon kere araun lu imorikikina kotoma Kristo arai ekotosi kesi aipikor ainingosia nu elangir nu elokinikini satana amoia abiror ekanisa.
“Aminanaros, ido emorikikinos esomaata nepepe, arai iwanyu ijo eong adiakarit, mam ililingi obu ne, kicorak eong, tetere mam ipaari,” abala Eibu.
Ingai bo Sam Okiror Eibu?
Erai Eibu lo ikaru 54, korai euriat lo Opiai B, ko kodistrikta loko Soroti, ido ijaunit ejakait okaru 1984.
Okaru 1985 abu oraun engarenon lo atumunak okanisa loko Baptist ido ne nesi adumuna arerengu na aitutuoro kwape ekalimonokinan osomero lo Baptist ko Jinja.
Kiding okaru, 1987-1991 aponi kosekunai kwape apolokiton atukot na ikalimonokinak ko Soroti.
Elome okaru 1991 toni 1993 abu ekanisa itojoka aijukar ngesi otem lo Kamuda ka ocaalo loko Lale alimonokin ejiri kitoni okaru 1994 ne enyakunere ngesi asipokin aicokis nako Soroti aitodol okaru 2017 ne asipokinere kwape ebishop.
