Eikare, aiyalama nesi kobu kodoik atumunak luko Kalaki District eraasi 15.12.2021 akaulo na adaun ilapio lu ipu emamete kede engarenon lo ebwoikit kesi ko district.
Etakanutos nu akaulo iyarei lu agwoitos; Daniel Ebunyu ( IND) kede Daniel Epotu (NRM) aikarun aseo nasodit na etolosio eraasi 27.01.2021.
Kesipoki erionget lo aseo bobo aseoacie, eraasi 25.02.2021, apotu bobo imongin lu kiriakuutu.
Winny Igeto na apolokit akiro nu aseo ngesi abu kolimo Daniel Epotu kwape etelakran kede abootin 118 ailany opopero ke Daniel Ebunyu lo obu kodum 79.
Herbert Ntanda loda erai Assistant District Registra lo Kalaki ngesi abala ebe elosit aseo ejok komamei adio ationis ido da lem edaritos kesi apak na naarai ajai abaagat na mam agolokitai adaun ilapio ikanyauni kau.
Daniel Epotu lo eyalama noi ngesi kobu kisialamiki atumunak kanu aijaikin ngesi arereng na aingarenikin kesi.
Abu kisumunik kesi engarenone lo ajokan.
