PALLISA – Auriak lu ejaasi idwe kec atukono nuko P6 ka P7 ko Opadoi PS Pallisa district kesi acamanaros aigang asioman na idwe kec.
Apotu kocamutu ailem isirigin lu euji, aingito naka angoli lap.
Alpha Galandi, apolon esomero loko Opadoi ngesi abala ebe esomero ejatatar kaidwe 1420 konye esisianakinak 12 bon kesi ejaasi iboro.
“Mam epatanar aswam ilema akoto auriak aibumakin adumun esisianakinak eroko idaritai lu apugan kwape mam ber itolomikitere.Galandi abala ebe erai ileic esisianakinak ainyam komam idwe.”
Kotoma akorakin na kangol esisianakinan idwe lu atukot, akoto Opadoi PS esisianakinak 25 apolouke 13 akadakina.
Eyatakit Galandi ebe, acamutu auriak aitac esisianakinak kanu ajokis na asioman idwe.
Bosco Okiria, apolon eicolong loka SMC ngesi abala ebe, idwe kesi esikakina atukono ido P3 na ikidioko idwe kakere naarai ejatar ka 198 konye acie kere erai idwe 200 kuju.
Okiria ngesi abala ebne, auriak lu itanyamete idwe kesi itodikinete kesi amina, ibore ijaikini kesi aswam ejok.
Simon Okwakol ka Michael Omagor lu agiritos alemio na isirigin 15,000 kesi apotu auriak icaasi nukec.
Lu iyarei kesi abakasi ebe, atukitos auriak isirigin lu ipu eroko ekorona egolokina akwap ido akoto ber itacaunai eimare.
Konye Silver Odengel, apolon eicolong loka PTA ngesi abala ebe, isigirin lu kesi abeitor atacia esisianakinak lu edumunio kanu aingarakin idwe nepepei akuma keda tests.
John Julius Okaki, ekasela lo kotem Akisim ne ejai Opadoi PS toms ngesi abu kolimok aurianet aigang esomero kwape eraar ekiyala lo edukunitos idwe, esisianakinak nepepei keda auriak.
Abala ebe, arai mam idopet eboliai epelu ke ejok, mam lucie nu iswamaunete.
Sylvia Asio, ekasela na angor kotem Akisim ngesi abala ebe, ilajara auriak lu kotem ke noi kanu aingarakit idwe konye Agule TC erai kangin ikoku ikiloi 15 lu ekirididi, ikiloi ikany lu emaragwe ka isirigin sh5,000 komamete lu tests kotoma.
MP Polycarp Ogwari ngesi abala kosimu ebe, alosi aingarakin isomeroi kere lu ecamunete auriak aigangio kanu aikisar division 4 ka 3 kobuku Agule.
