KATAKWI – Erionget lo engici amidicio na apiyai kede iboro lu apugan nesi kosabiiti lo atubor abu kouniar aitacaunun akiro.
Eraasi 2.12.2020, apotu itunga koroikisi IGG kwape erionget lo amen aitodolikin epelu ke lo aitiji ecamusana.
Kotoma aurianet na ajaikina engarenok lu; ediini, eriongeta lu ojokotau, apolok luka atekerin, eyengunak aswam keda lu emunotor lucie apol kesi ajaikina aurianet.
Action Aid ipadicasi ka Teso Anti-Corruption Coalition kesi etemokitos ainapeta ngun.
Angurianete itunga ebe, anonokar erionget lo IGG kotoma aitiji ecamusana ido ekoto nesi aiketakin arokoba.
“Eong akooto kongicai amidicio na apiya kane ejaasi eswamak ageun kokuju kitoni kwap,” abala Ignatious Omoding, eyengunan kotoma aswam na apugan.
Eyatakit ebe, iteikit IGG itunga lu iilakina ocamusana konye komam ikamunete edio.
“Kanu inyo emidicere apiyai kosi nu ilemi isio kotoma osolosinei, adumun aswamisinei da mam epatana,” akudiani Omoding.
Anguriani Omoding ebe, mam ngesi ewanyunitor kede apupun idio itunganan yen emidici apiyai itosao kede aiwen.
Vicent Ocen, apwakunan lo atukot naka SUDA inera kodakite eitabo lo ajenanut ngesi abala ebe, mam imurok lu adekis epalaritos aicir apiyai kane ejaasi adekak lu ebeit ti adumunun amukian na atitai.
“Abu engo kalot adekis na apolon ko Soroti ido aponi kingitai eong apiyai kanu eijeng aberu ka ido kijaikitete apak na ibusakinitor alemun. Abu eong kenomak atupitok IGG esimu konye mam apotu kopedoros nAarai amame ajenananut,” abala Ocen.
Angurini ebe, iyapete adokena nuka IGG kanu akacun itunganan yen iilakina ocamusana. Julius Arugu, lo erai epolokit ainapeta ko Public Affairs Centre –Pac Uganda, ngesi etijenarit ebe, mam cut apugan enapakit itunga lu okwap kede apedor na keda aingic eipone lo emidicere apiyai kec.
Aibungeta nu ikisila 17 (I ) xvi, keda aibunget 38 ngesi ecamakit etungan lo okwap aingitun eijaanakinelo idelele kane ejaasi engarenok. Ecamakitos da bobo ikisila itunganan aingitun engarenon eipone lo itosomatere apiyai nu apugan kede eijaanakine lo itekoro komameiecamusana.
Arugu ngesi elipit eyapesi lo engici akiro nu amidicio na apiyai keda ecamusana aisiketikin apugan aitacaun aswam kec kacut aitanap itunga apedor na aijen eipone lo aikam lu emidicete apiyai apugan .
“Akoto ber eong aingit luko IGG ebe, idi bo ber itunga ko Teso kede imusagon lu itunga lu etobwoi k’adieket kosodete aitepesen?” engisit Arugu.
www.aicerit.co.ug | Na Emmanuel Olinga
Anguriani Arugu ebe, eminasi icie imusagon adaun ilapio ikanyape kiton ikanyarei kanu aingic emusaagoElizabeth Achili, eswaman korionget lo ka IGG, ngesi etacaunit ebe akiro kere ejaasi ne ejaasi itunga kanu aikwenyakin eyapesi kec nu iswamasi.
Eyatakit ebe, kwape erionget, ikidioiko eswamak ido mam epedori ajaut aiboisio kere konye erai itunga kesi ebeit apesinikin angurian kec oyapesi.
Eyatakit ebe, ekadakada lo apiyai nu edumunenei IGG nesi esusut lo ationis na edoikit eyapesi kec kanu aitodolikin eijaanakine ne ejaasi itunga. “Imina isio adumunun aticepak sh600,000,” abala Achili.
Okaru lo 2018 apotu nu ecamusana isiriengutu itunga luko Serere akaulo apedorosio aidadaikin aitutub ebe, edolit itunga ailem sh150,000 kanu aijeng angor nu emeni aidoun k’adekis nako Serere H/C IV. “Asiomata idwe kosi konye mam epatana adumun aswam.
Elimokinio ijo ebe , olacak emong ,oyau engarot ecikakinata apapula tetere mam ekwam ekutari,” epudupuda Naboth Oduc, eyegunan kwape apolon esomero ko Katakwi distrikt.
“Okwe IGG, kolemasi ber esu ipolok lu adongakinos oyapesin lu itolomere aswamisinei ko distrikt naarai apolor ecamusana,” abala Oduc. Eyatakit ebe, akiro nu esidikoto ecamusana kesi; eitekerene, einacane kede akokoo na apiyai.
Oduc lo emonyi ebe adau kana ilapio 69 mamedumunit epension ke ko distrikt ngesi elipit ebe, ekot aitatac itunganan apiyai karai edumun emidicit apiyai.
Isreal Odongo ngesi anguriani ebe, ayangana ngesi angurian oyapesi loka IGG kanu apiyai ke nu aiyengun k’aswam konye amen IGG aitemokin ationis ke.
“Abu eong kadum eswaman ediope koyapesi loka IGG lo abu kinngit eong ebe, ‘inyo ber irima ijo oyapesi lo bala ne enyamaritere apiyai kon?’. Abu ibore ngin kicum eong etau noi,” anguriani Odongo.
Benjamin Tukei, lo eyait ainapeta koyapesi loka Action Aid ngesi abala ebe, kilip itunga aisac araut lu isidikete ecamusana.
Ikote akiro nen da, atupiton aingican ko IGG koyapesi lo Soroti, Godfrey Mubiru ngesi abu kilip itunga kere aiyatakit aijulira akro nu ecamusana.
