Abulonoki Fr. Abacu apugan nu asioman


Abacu, emugaati,
Fr. Abacu Jorem itanyamikini ekuristaayot akuan naka Yesu Christo
Sports View Hotel 730x31 Ad

KATAKWI – Asioman nesi elacet! Kitoni araun esaseredoti da ekoto asioman kocae.

Kanu adeka na ekorona, abu President Yoweri Museveni kitobwou ber akiro nu asioman kosomeroi, ibore abu kicum Fr. Abacu Jorem etau.

Alacuni Fr. Abacu amamus aiyalama ke kosabiiti lo atubor.Abala ebe, mam aomisoit na agolokin isomeroi arai ibore yen adolit aisomaun ko Uganda.

“Yes ber kane ko Usuk, idi itunga edumunitai edekasi ekorona?” engisit Fr. Abacu ikuristaayon.

Kelimutu itunga ebe, emamei etunganan lo inwakunitere ekorona korasikini Fr. Abacu aidu apugan kanu aitolomun aicorakinet na aigol isomeroi komam engicit aidules ejok.

Eyatakit ebe, esubit bala erai aise ikur kobaale naarai acamakisi isomeroi icie ko Kampala atukono kere abongokin asioman konye kosalite Teso etupakit aicorakinet na abeanakin anganar atukono.

Esomasi ngun kere ko Usuk Center ne esirerengere aisubis ke Simon Peter Ojaman, ekansila lo kotem Usuk.
Aisubis na agwelanar apiyai nesi ajai Ojaman apukor, ibore abu kisuumok itunga kwape ayapiar apak na angetakinere aseo nape bobo aponi kilasere ngesi akwap akaulo adaun ikaru 15 edongit emakuk.

Aponi da bobo kisirerengoi ekale kec Ojaman koiponesio lu egelegela.

Pac, abu erionget lo asioman kogeu acamakin atukono nuko P.7, S.4, S.6 kede acie nu engetanakinete aitutuonor, ageun abongokin asioman.

Kedautu ngun aswam angito, kocamakinete nuko P.6, S.3 kede S.5 da.
Akiro ngun kere, arai kanu ebe, aitikitik anyalatoi na adeka na eseny akaulo ber President Museveni agolokin akwap.

“Erai ngin arimanut na amudukanut,” enera Fr. Abacu kanu ikisila lu apunkonor atukono nu asioman kotoma atupeta.

Kanu aitanyam ikuuristaayon akuwan naka Yesu Kuristo, abu Fr. Abacu kitoron apugan kanu aicorakin kesi aitobwoun aikopanakin ikuristaayon emugaati aitukes kec.

“Inyoni atiaketait eong aikopakin etunganan emugaati akan ke ka eong aitanyamikin toma akituk?” akudiani Fr. Abacu.
Abala ebe, esubit ngin amwangit eipone lo ebeitor aijaanakin ejakait Yesu kuristo lo erai emuron lo adekasinei kere.

Edaunit Fr. Abacu ailek akiro ngun, kocopi aitan amerekekin ke emugaati aitukes mere aikopanakin akanin kec.
Arai itunganan akukokin do aimielun angajep kanu Fr. Abacu aipikakin emugaati akituk ke.

Enera Fr. Abacu kitoikitos ikuristaayon aki ido kililingete ti.
Ejaasi ngun da, abu kicorak Iteso aimorikikin kede aminanar kanu apol.

Karai imina ijo iyemuto lu, komorata keda lucie itunga.
Previous Esurum Bishop Tukei Bishop Oyet ileic k’adieket
Next Ekisa Japan ‘aisiom k’okito’ ko Katakwi

No Comment

Leave a reply