TESO – Ne alomara epate loka NRM aitolot aseo, Naikanyet, araasi 04.09.2020, kanu asekun lu edakete emeedera loka MP lo obukui ka idistriktan, lu ipu, ajenete ebe erai akiro nu apataka naarai aracete kesi eijiri kanu ayuwarite epate kec karaida eroko akiro ka noi noi aijul ekisil lo ikaru lo etutubio Otibar 2017.
Ko Teso, abu aseo kosub bala aitoronio na epate loko NRM ka MPs lu engirikitos airam akiro nuka epate karaida emwaka iboro konye nu aumokin, aponi kilanyai koyaete abwaak luitetiak inerio kec. Maria Gorretti Ajilo, na edila eirab ko Kaberamaido distrikt, ageun ne agearor aseo nako NRM purimaris, ngesi mam ipaupa ke luko Kalaki ka Kaberamaido eteete ejok naarai abu kosek mam aijul ekisil lo ikaru karaida eyalamasi itunga lu ejukaritos ngesi airabet ido apotu bobo kijulakinos aijaikin Jennifer Ayoo, na mam ejenio kokirigi loka NRM kilany Ajilo kede abootin 13,080 ka 10,526.
Abala Ajilo ebe mam akiro ke apataka apaaran cut na alimoror ngesi ebe ebwoi
kwana ko distrikta loka Kalaki, lo atiakuno ko Kaberamaido distrikt. Abala ebe apotu itunga kere koremokinos aitiji ngesi karaida atamitos aseak ke acakakin abootin kec kanu ainyakar ngesi kwape na edakit emeedera.
Egangiton ke Ajilo kesi anguriani ebe apotu engarenok icie luko NRM kisiarakisi akiro nu aibe nu ebe etoronitere ekiror ke ebe mam akoto atiakuno na ebuku loka Kalaki ka ebe Otuboi kodistrikta loka Kalaki. “Mam eong acamunit akiro nu aseo. Ejulirat eong akiro ngun naarai ajaasi icie iboro lu nyodoka lu eswamasi kotem Otuboi ne acamakitere idwe lu ikaru 10 da aibwo okokoro aisek,” abala Ajilo.
Ngupengun apotu kisomaunos ko Kumi distrikt ne abolobolotor MP na angor ko
Kumi, Monica Amoding, kwape na acai akou, konye abu LC5 Christine Apolot, kilany ngesi edumu abootin nu ipu, kitiiriani kanu Amoding. Ejenara Apolot kwape apolon eicolong LC5 nasodit kanu atukokin aurianeta naka ekansulo kanu aitutub alemario na ekisil lo ikaru.
Abu Apolot kogiriau abootin 38,215, ido Amoding ngesi abu kodum 18,795.
Angor nu aarei ageun okaru lo2017, ne alimoror Apolot ebe ekot alomakin Amoding, mam inerasi kodoco, toni lu ayuara da ko Kumi idila asuronokin Amoding. Apak adiopet apotu kodapiatar ko alaro na aboliasio na osomero lo.
Atutur inumunumio apaaran na aipugaikin bon, ido nu aumokin apotu ipolisin koneyaros ne iboyo Amoding toni adakar akiring na atubokit itunga ainyam, apolouke ebe acamakitos Apolot apak na ailopidaikite Kumi naarai esomi ikosiosinei lu erami epate, ido akiro nuka aseo da itodiete kodoco.
Kireik ijo ko Amuria distrikt da Susan Amero, MP na angor kangina na abu kongerok aijulio na ekisil ngesi aponi kiswelorai kwap kesekun Rhoda Achen, na isomai togo lo apugan. Teddy Acam, araman itunga opate loka NRM ko Teso, ngesi abala ebe nu isomatos aseak luko NRM ibecokina kede ikisila ka inonosio lu epate ido ebe ekot kesi atupanakin nuka epate mere nu itunga.
Kane ejai Acam abala ebe ekot MPs ka itunga kere lu abwoitos amaria inerio opate acamun akiro nu alomutu, naarai erai ngun nu etutuboto aseak.
Konye Amoding inerasi kede lu Aicerit, ngesi abala ebe mam ngesi ecamuni akiro nuka aseo naarai esirimio aseak ngupe ngun kangin aiboisit na asekere.
“Mam akiro Edauna. Ido abuni eong aibwo kwape abonipe. Akoto eong ilanyai koipone lo idelelei mere lo makac,” abala Amoding. Karai ecamunete lu aponi kitelekaarai akiro nu aseo ka atupakin ekisil lo epate, mam kwape lu obonipe, elacunos nu abeit karai ekokotai aseo karai mam.
