KATAKWI – Duc ne ikeuniata itunga amamus aiyalama, mam esusut loka ationis elwana. Erai teni abeit ebe, mam apuru epuruuni komamei akim!
Ngun kesi atakanutu ko Katakwi. Engurianete itunga kanu anyodokok kede ajaut naka aijar na itunga oitelesit.
Aipanya nu ejaasi osiepion nuka irotin kesi esusut. Katakwi TC nesi eperio ationis na.
Adukio na irotin kalu anyoun ko Soroti kitoni Moroto nesi itolosi China Communications Construction Company (CCCC).
Ko Katakwi TC, erai JJ Odongo, Ilemukorit , Bidandi sale, Market street keja icei da kesi irotin aponi kobukokinai ekolas keda aipanya nu eleliata akipi.
Aipanya nu kesi etedelosi itunga lu ebalasi ebe, mam aipanya iswamatai ejok.
Samuel Omukat 34, lo Abela ngesi anguriani ebe, karaida elai aswam na erot lo apolon, konye epungit eipone ke kowai lo aipanya.
“Akaulo na adukio na aipanya nu, awaanyu eong akangasia awongon 4. Alumonosi icie aipanya nu ido atwakiasi icie ikela. Ekot amoun eipone lo aitemokin ationis na,” abala Omukat.

Eyatakit ebe, eroikit ationis ngin itunga lu elosete kede akeje ka lu elosete akeje.
Anguriani ebe, ationis na epol kakere nesi aidules na aipanya naarai ebokitai noi.
“Kwape abunio edou, erai do kwana aigalalaunun itunga kotoma aipanya kanu,” eyatakit Omukat.
Aipanya nu kesi edukitai kede amoru ido mam erapanakitai. Kotoma okisila, ebeit aipanya nu kotaun arapit kere. Karai edumu etunganan akangasi kotoma aipanya kangun, ebeikini etunganan lo ebolorit aiduk aitac.
“Ebeit eduke kwakangol ojai osama konye mere Otaun.”
Elipit ngesi ebe, ekoto apugan na edistrikt aireikin ainapeta nu irotin kalu karaida erai adukio na irotin kalu adokon na erot lo apolon lo enyouni ko Soroti kitoni Moroto.
Martine Ediedu, atupiton apolon eicolong loka LC1 kocaalo lo Katanga, Katakwi TC ebe, edolit apugan arapanakin aipanya ngun kanu aitidisiar akangasia.
Ejaasi aipanya ngun kitoni ingaren na idukai ido erai ikulepek idukai atapit aibwanakin akito nu icakete itunga kanu atubonor.
Epol bobo itunga akurianu kobalasi ebe, karai ber etiono adumun amukian k’adekis na apugan karai ebila itunganan, do konye karai ebilibilunos lu ipu.
Eyatakit Ediedu angurian ebe, ekeunos akangasia nuka aipanya kanu.

Eyatakit ebe, erai kwana akan ke na okediany kede esiep lu eriebete apipilu.
Erai kana ipolok keda amakio ailia bala imukerun kanu aitub erot naarai mam epedoritos aitub irotin karai emamei amadala.
“Karaida ekingok erai aimo ne itoro kanu atubokin erot naarai elalak ido idulok aipanya ngun,” abala Ivan Amodoi, etekeran amotoka ko Katakwi.
Eyatakit ebe, idaracan da mam itebenikitai ejok.

Ben Kiwanuka Angiro ngesi mam eyalama kede eipone lo ayagaunata aipanya nu akangasia.
Abala ebe, ejokuka aipanya nu kanu alele na akipi konye mam ibusakinito ajaut kiding na etaun.
“Ibore itakadikit eong ngesi ebe, kilot ijo Napak distrikt, edukitoi kwa aipanya ejok. Inyo do erono ko Katakwi?” abala Angiro.
Eyatakit ebe, ekot edisitrikt aikeun icop kosodi aite ationis ngin kwape ibore yen edolit aitemokin.
“Kiwanyu akimiak nu ayuara da, edupitai nu itwasamaetea akim Katakwi konye kidol ijo Napak itosomaete kwi nu agogong na akolong. Amen kwana Katakwi TC ayuar iwayai kane ejaasi ikokolak. Do bobo moi aitac UMEME,” anguriani Kiwanuka.
Ikalotok lu ipu kesi ingitanaros ebe, inyobo edukere irotin ngun kwangin?
Engicunit Aicerit ebe, aiswamao na alelesia kanu kesi abu CCCC kikopaki bobo ekanpuni ecie lomam aponi kongicunai aitolot adukio na aipanya kangun.
Andrew Echatu, Engineer loko Katakwi distrikt ngesi abala ebe, adukio na aipanya nu itekerete akipi kotaun nesi imanimanio.
Acamunit ebe, adautu kesi awanyun ebe, idulok aipanya noi ido kolalak noi, ibore ibwakit awate nu itunga oitelesei.
Abala ebe, edodor kesi airiamun kede adukok aipanya nu kosodete apesekin aimony na itunga ne ejaasi kesi.